O edificio municipal
da rúa de Santa Clara, número 4, que ata hai poucos meses acollía as
oficinas da Concellería de Promoción Económica volverá funcionar como
viveiro de empresas, o fin co que foi construído nos anos 90.
A convocatoria publicarase nas próximas semanas e abrirase un prazo para a presentación de solicitudes.
O obxectivo é que o Centro Municipal de Iniciativas Empresariais estea aberto durante este outono.
Nace así o terceiro viveiro da cidade (súmase aos da Cámara de Comercio e o que acaba de estrear a “Asociación de Jóvenes Empresarios”).
Poderán optar aos espazos dispoñibles ( seis locais) as persoas físicas ou xurídicas que desexen iniciar unha actividade empresarial ou profesional en Pontevedra.
Os locais están deseñados para actividades de oficina ou administrativas.
Non poderán dedicarse
a actividades molestas, insalubres, nocivas ou perigosas, nin tampouco
a actividades comerciais que requiran licenza ou á venda directa de
produtos.
Os adxudicatarios asinarán un primeiro contrato por seis meses, ao que se poden acumular prórrogas ata un máximo de dous anos. Pagarán prezos simbólicos que oscilan entre os 80,77 euros ao mes dos locais simples aos 161,55 euros mensuais dos dobres. Tamén é posible compartir local cunha tarifa de 56,54 euros mensuais. Disporán de sala de xuntas, servizo de recepción e asesoramento a cargo da Axencia de Desenvolvemento Local e dos orientadores laborais do programa ILES.
As empresas elixidas deberán estar encadradas preferentemente nalgún dos 19 xacementos de emprego que se consideran prioritarios, a partir de catro bloques temáticos:
- Servizos da vida diaria (servizos a domicilio, coidado de nenos, novas tecnoloxías da ifnormación e da comunicación, axuda a mozos ou inserción social).
- Servizos de mellora do marco de vida (mellora da vivenda, a seguridade, os transportes colectivos locais, a revalorización de espazos públicos, comercio de proximidade).
- Servizos culturais e de lecer (turismo, audiovisual, valorización do patrimonio cultural, desenvolvemento da cultura local, deporte).
- Servizos de medio ambiente (xestión de residuos, xestiónd a auga, protección e mantemento de zonas naturais, control da contaminación, control da enerxía).
Outros criterios de selección terán en
conta o grao de innovación da proposta, a creación de postos de traballo
(directos e indirectos), a capacitación profesional dos postos de
traballo, a necesidade de tutela e asesoramento, a utilización ou
potenciación das materias primas autóctonas e as expectativas de
crecemento do proxecto.
Información na Casa da Luz (Praza da
Verdura) sede da Concellaría de Promoción Económica do Concello de
Pontevedra. Tel. 986 848552
No hay comentarios:
Publicar un comentario