DEPUTACIÓN DE PONTEVEDRA
Gabinete de Comunicación
02 MARZO 2012
A Unión Europea concedeu á Deputación Provincial
de Pontevedra 65.000 euros para o financiamento dun proxecto orientado a
promover o autoemprego xuvenil e a impulsar iniciativas de
desenvolvemento sostible. Así o anunciou esta mañá en rolda de prensa o
vicepresidente da Deputación Provincial, José Manuel Figueroa Vila, quen
subliñou que se trata dun proxecto moi “significativo” tendo en conta
que se trata de contribuír á xeración de emprego nun momento de crise
coma o actual.
Baixo o título de “Emprendedurismo e innovación sostible”, este programa
pretende poñer en marcha unha rede de innovación entre mozos e mozas de
5 países (España, Italia, Bosnia, Letonia e Croacia) e á que se poderán
ir sumando todos os que teñan ideas innovadoras relacionadas
preferentemente con negocios sostibles.
A rede crearase á partir da celebración de 7 seminarios de catro días de
duración cada un e no que participarán 560 mozos e mozas dos cinco
países citados.
Nestes seminarios, os participantes –que serán seleccionados en base ás
súas ideas innovadoras e o seu carácter emprendedor– non só obterán
formación e información sobre como sacar adiante os seus proxectos senón
que, sobre todo, terán ocasión de expoñer as súas ideas e obter socios
que participen na mellora da mesma e na análise da súa viabilidade, así
como no seu financiamento.
De feito, os proxectos innovadores pasarán a un catálogo (portfolio) de
proxectos innovadores e sostibles que as entidades colaboradoras no
proxecto se encargarán de difundir para captar financiamento, de forma
que os emprendedores poidan convertelas en negocios.
No entanto, o obxectivo do proxecto é máis amplo, xa que pretende que
este intercambio de ideas e a creación de autoemprego non pare no
seminario, senón que se estenda de forma indefinida no tempo. Para iso,
porase en marcha unha ferramenta web a modo de “mercado de ideas” onde
os emprendedores poderán rexistrar os seus proxectos e sumalos ao
catálogo para captar financiadores.
O obxectivo é que este portfolio de proxectos innovadores medre de forma
permanente con novas achegas e se converta nunha plataforma de
financiamento para os mozos e mozas emprendedores.
XUVENTUDE EN ACCIÓN
O proxecto, que conta cun orzamento total de 200.000 euros, será
financiado nun 32% con fondos europeos do programa Xuventude en Acción,
xa que o proxecto presentado pola Deputación Provincial cumpre cos
obxectivos marcados por este programa para o período 2007-2013.
Entre estes obxectivos está o de desenvolver e apoiar a cooperación
europea no ámbito da xuventude, facilitando o intercambio e a relación
entre culturas en distintos ámbitos e promovendo a participación da
xuventude na vida pública e o seu espírito de iniciativa, de empresa e
de creatividade.
No hay comentarios:
Publicar un comentario