Roteiros para a xuventude

Roteiros para a xuventude A Dirección Xeral de Xuventude e Voluntariado pon en marcha, un ano máis, Roteiros para a xuventude, un programa de saídas de fin de semana que permite o contacto coa natureza ao mesmo tempo que combina o lecer, o deporte e mailo coñecemento do noso contorno cultural e ambiental.  Os obxectivos xerais desta actividade son ofertar á xuventude novas experiencias e alternativas para o tempo libre, así como a transmisión e o coñecemento de valores como a convivencia, a cooperación, o asociacionismo da mocidade galega, entre outros, favorecendo as relacións interpersoais e a creación dun bo ambiente de grupo. Destinatarios: Persoas con idades comprendidas entre os 18 e os 35 anos.  Inscricións: Os interesados e interesadas neste programa poderán facer a reserva de praza a través de chamada telefónica, desde o día 26 de febreiro de 2013, aos números 981541689 / 981545822 / 981545937 / 981545702 e, en horario de 9:00 a 14:00 horas, de luns a venres.  Unha vez reservada a praza, deberase efectuar o pagamento da cota de participación no prazo máximo de 48 horas.  No momento de facer a chamada darase a información oportuna sobre o xeito de facer o correspondente ingreso.  Documentación necesaria a presentar Xustificante do pagamento e copia do Carné Xove, de ser o caso, que deberá ser remitido á Dirección Xeral de Xuventude e Voluntariado ao  enderezo electrónico roteiros.ctb@xunta.es. Non se considerará confirmado ningún participante ao que lle falte algún dos documentos mencionados con anterioridade.  Aclaracións de interese De non realizarse o pagamento da cota no prazo máximo de 48 horas, a Dirección Xeral de Xuventude e Voluntariado disporá da praza reservada. Procederase á devolución da cota cando, por causas non imputables ao interesado, o servizo non se preste ou cando a Administración anule a actividade de que se trate. Máis información www.xuventude.xunta.es  Normas de desenvolvemento da actividade Lémbrase aos/ás participantes da necesidade de respectar o descanso do resto das persoas, tanto das inscritas na actividade como das alleas a esta. Ao comezo da actividade, os monitores solicitarán a cada un dos participantes a presentación do DNI ou documento acreditativo semellante. Calquera persoa que non figure como participante nos datos da organización será excluído da actividade. Calquera cambio na titularidade da praza debe ser consultado e autorizado pola Dirección Xeral de Xuventude e Voluntariado, como mínimo, 10 días antes do comezo da actividade. É imprescindible saber nadar. As actividades poderán sufrir modificacións en función das condicións meteorolóxicas. As actividades do devandito programa son obrigatorias e a non execución destas, é motivo de expulsión, a non ser que exista causa xustificada. É aconsellable chamar ao teléfono de contacto da empresa organizadora das actividades, co fin de obter información máis polo  miúdo da ruta, das características do aloxamento, do material necesario… A hora da incorporación á actividade é o venres entre as 19:00 e 20:00 horas. O remate desta, será o domingo antes do xantar. A cobertura das actividades non inclúen os desprazamentos (nin de ida nin de volta) entre o punto de partida e o lugar onde se desenvolven as actividades. É moi importante utilizar un calzado axeitado, resistente, flexible e impermeable, xunto cuns calcetíns gordos que permitan que a bota e o pé estean axustados para evitar rozaduras. Compre ter a man sempre algo de roupa de abrigo e para a choiva. Nos días de moito sol é recomendable levar protección solar. Non esquezades a tarxeta sanitaria e os útiles de aseo. Instalación Albergue Xuvenil de Gandarío – Bergondo (A Coruña) Número de prazas 30 prazas por fin de semana Datas de realización Marzo: do 15 ao 17 e do 22 ao 24 Cota de inscrición A cota de inscrición será de 54, 45 € Os/as posuidores/as do Carné Xove, pagarán 49 €  Actividades Padelsurf Wakeboard Windsurf Vela Kaiak Inchable de arrastre acuático  wakeboard Equipamento necesario Saco de durmir Calzado cómodo, chancas para as actividades no mar e traxe de baño. Neceser de aseo Toallas Cobertura das actividades Aloxamento en réxime de pensión completa en cuarto múltiple. Transporte no ámbito da actividade. Actividades con monitores-guía e material para o seu desenvolvemento. Traxe de neopreno, licra identificativa e chaleco salvavidas. Programa de actividades Venres 19:00 h. Recepción dos participantes 20:30 h. Cea Actividade nocturna Sábado 8:30 h. Erguerse 9:00 h. Almorzo Actividades pola mañá:  Padelsurf e wakeboard 14:00 h. Xantar Actividades pola tarde: Windsurf e vela 20:30 h. Cea Actividade nocturna Domingo 8:30 h. Erguerse 9:00 h. Almorzo Actividades pola mañá: Kaiak, inchable de arrastre acuático wakeboard 13:30 h. Fin da actividade