Programa Aula Xuventur 2013

Aula Xuventur está dirixido ao alumnado de educación secundaria obrigatoria (ESO), 1.º curso de bacharelato e 1.º ciclo de grao medio, que curse os seus estudos nos centros de ensino galegos e non teña cumpridos os 18 anos. MÓDULO I. MARZO MARE NOSTRUM O módulo I da edición de Aula Xuventur 2013 terá lugar no albergue xuvenil de Gandarío, coa actividade Mare Nostrum, na que poderán participar ata 240 mozos e mozas galegos/as. QUENDAS MARZO Luns 4, martes 5, mércores 6 Mércores 6, xoves 7, venres 8 Luns 11, martes 12, mércores 13 Mércores 13, xoves 14, venres 15 Luns 18, martes 19, mércores 20 Mércores 20, xoves 21, venres 22 A hora de chegada ao albergue será ás 11:00 horas da mañá do primeiro día e a hora de saída será ás 12:00 horas da maña do último día. PARTICIPANTES Alumnos/as de entre 12 e 17 anos que estean cursando educación secundaria obrigatoria (ESO), 1. ° curso de bacharelato e 1. ° ciclo de grao medio. 40 prazas por quenda (incluíndo, como máximo, 2 profesores gratis). DESCRIPCIÓN Obxectivo xeral do programa: Interactuar en primeira persoa e vivencialmente co entorno e coa vida mariña, a través de diferentes actividades lúdico-formativas. Obxectivos específicos: saber máis sobre os recursos etnográficos e culturais do entorno mariñeiro das Rías Altas, en concreto, da Ría de Ares e Betanzos; practicar as diferentes artes de pesca tradicionais en relación co entorno e as súas xentes; educar en valores, mediante o deseño dunha estratexia transversal durante o programa, fomentando a cooperación entre os/as participantes; fomentar hábitos de vida saudables, así como prácticas responsables en relación o medio mariño e o seu contorno mediante a navegación en barcos de vela. ACTIVIDADES O programa desenvolverase cunha metodoloxía activa baseada na participación e interacción dos/as rapaces/as, como protagonistas do seu propio proceso de aprendizaxe, co “entorno do mar”. Primeiro día: Bioloxía mariña: xeocaptura “O intermareal” (fauna e flora da ría) o marisqueo. Práctica con diferentes ferramentas para o marisqueo. Fauna e flora da Ría de Ares e Betanzos: as especies, as algas, o hábitat,... O cultivo das diferentes especies polo home: procesos de cultivo e recolección. As ferramentas de traballo: o raño, as nasas, as redes,... O porto pesqueiro e o porto deportivo. Saídas a navegar en raqueiro a vela. A navegación a vela: historia, antecedentes, usos para a pesca, o vento, cadro de nós mariñeiros, tradicións da vela mariña... Arbolar un barco de vela. Nomenclatura básica náutica e de navegación. Rumbos. Segundo día: Visita á lonxa e ao porto pesqueiro e deportivo de Sada. Visita ao porto pesqueiro e identificación de barcos de baixura. Visita a lonxa e probar o mecanismo da subhasta de peixe e mariscos da ría. Diferenciar os diferentes botes e barcos de pesca. Coñecer a profesión dende as vivencias dos mariñeiros/as. A man do home, a puxa, a lonxa, a venda de peixe e marisco da ría. Bioloxía mariña: xeocaptura “O intermareal” (fauna e flora da ría) o marisqueo. Saídas a navegar en raqueiro a vela. (Cambios de grupos do día 1). Terceiro día: Xogos tradicionais nas vila mariñeiras: a rá, a chave, a sogatira, os trompos, bolos celtas…. Actividades de noite “Veladas”. Descubrindo a Ría de Ares e Betanzos: Unha busca do tesouro ou un trivial na instalación. O mar en perigo?: videoforum, o mar e o cambio climático creando un xogo de rol playing coa temática. Actividades alternativas en caso de choiva. Visita a fábrica de Sargadelos de Sada. Gran Parchís das Rías Altas. A debate: “O home e o mar”; “As vedas”; “O furtivismo”. SERVIZOS INCLUÍDOS Aloxamento no albergue xuvenil de Gandarío en réxime de pensión completa. Programa de actividades, monitoraxe e material necesario para o correcto desenvolvemento da actividade. Desprazamentos durante as actividades. Seguro de accidentes e de responsabilidade civil. NON SE INCLÚE O desprazamento de ida dende o centro escolar ata o albergue, e o de volta dende o albergue ao centro escolar. EQUIPAMENTO DOS PARTICIPANTES Deberán levar os seus útiles de aseo persoal, toallas, chancletas para a ducha, roupa cómoda, roupa de abrigo e de auga (chuvasqueiro), botas de montaña, calzado deportivo e bañador. Recoméndase unha mochila e é indispensable un saco de durmir. Como equipamento opcional recoméndase un traxe de neopreno e licra (no caso de non dispoñer del, facilitarao a organización). INSCRICIÓNS E RESERVAS A inscrición realizarase unicamente na modalidade en liña, dende a páxina web da Dirección Xeral de Xuventude e Voluntariado: www.xuventude.net. A inscrición deberá realizala o centro de ensino correspondente. Non se admitirán solicitudes individuais do alumnado. Cada centro de ensino poderá solicitar e participar en diferentes quendas, ata cubrir as prazas. PRAZO DE INSCRICIÓN O prazo de inscrición comezará o día 25 de febreiro ás 10:00 horas, e finalizará unha semana antes do inicio de cada quenda. O formulario estará dispoñible na páxina web: www.xuventude.net. Non se admitirán as solicitudes cuxa data e hora sexa anterior á sinalada. ADXUDICACIÓNS DAS PRAZAS As prazas adxudicaranse por rigorosa orde de chegada das solicitudes e asignaranse ata esgotar todas as dispoñibles. No prazo de 7 días dende o envío da solicitude, enviaráselle ao enderezo electrónico que figure no formulario de inscrición, un correo no que se confirmará, de ser o caso, a adxudicación da praza. De non recibir a comunicación de admisión no prazo de 7 días, entenderase que non se obtivo a praza. Unha vez comunicada a adxudicación de prazas ao centro educativo por correo electrónico, este disporá dun prazo máximo de 5 días para enviar a documentación correspondente, que se sinale na comunicación de adxudicación, á Dirección Xeral de Xuventude e  Voluntariado. No caso contrario, poderá ser excluído do programa. CONDICIÓNS DE PARTICIPACIÓN Son viaxes en grupo e, en consecuencia, débense respectar os horarios establecidos, tanto para as saídas programadas como para os servizos opcionais. Así mesmo, durante o desenvolvemento da actividade deberá manterse un comportamento acorde coas normas de convivencia e un trato correcto cos demais participantes e co persoal da organización. Durante a estadía nos aloxamentos, respectaranse as normas de organización interna en cada un deles. As persoas organizadoras reservaranse o dereito a cambiar algunha parte do programa ou servizo. Poderá tamén cancelarse, no caso de que sexa necesario por seguridade das persoas participantes. A realización e o desenvolvemento das actividades estará condicionada polas condicións meteorolóxicas xerais. A Dirección Xeral de Xuventude e Voluntariado poderá cancelar calquera dos programas, no caso de que non exista un número mínimo de participantes. Se calquera das persoas participantes incumpre as normas xerais que alteren o desenvolvemento normal da actividade, a persoa poderá ser expulsada do programa. Neste caso, a Dirección Xeral de Xuventude e Voluntariado non se fará responsable da viaxe de volta da devandita persoa, nin reembolsará ningunha cantidade económica. Será necesario levar a tarxeta sanitaria durante a viaxe. DEVOLUCIÓN DA COTA DE PARTICIPACIÓN Só se procederá á devolución da cota de participación cando, por causas non imputables ás persoas interesadas, o servizo non se preste ou a Administración cancele a actividade. Descarga aquí o pdf informativo Formulario de Solicitude